डॅडीज गर्ल

डॅडीज गर्ल!! आजकालच्या समस्त पुरुषवर्गाच्या अनेकवेळा ओठावर येणारा पण कदाचित तिथेच थांबणारा शब्द. बायका मम्माज  बॉय, बायकोचा बैल वगैरे विशेषणं अगदी सहज वापरतात पण त्यामानाने डॅडीज गर्ल हा शब्द फारच कमी वापरला जातो. मला मात्र  ममाज बॉय जेवढ पटायचं तेवढ डॅडीज गर्ल पटत नव्हत पण हा डॅडीज गर्ल चा प्रत्यय मात्र मला प्रत्यक्षात माझ्याच घरात आला. माझी ९ वर्षांची मुलगी चिन्मयी आम्ही तिला चिनू म्हणतो. या लहान मुलांच्या डोक्यात कधी काय येईल सांगता येत नाही. त्या दिवशी स्वतःचाच लहानपणीचा फोटो घेऊन आली आणि मला विचारू लागली,"आई सांग तुला कुठली चिनू आवडते मी का हि फोटोतली ?" मी काम करता करताच  काहीस वैतागुनच म्हणाले, "चिनू काय वेडेपणा आहे. त्रास देऊ नकोस ग". पण हि पठ्ठी काही ऐकायलाच तयार नाही. 'सांगा ना आई'  चा हेका चालूच. मग मी हि म्हणाले "दोघीही". "नाही एकच सांगायचं .....चिनू. "नाही एक नाही सांगता येणार हा. तू सांगू शकतेस का जास्त कोण आवडत, आई कि बाबा?" मी माझा हुकुमाचा एक्का काढला. यावर मात्र ती जरा हिरमुसली आणि निघून गेली. मी सुटकेचा निश्वास टाकला. तेवढ्यात परत येऊन म्हणते कशी, " अग तुम्ही दोघ  वेगवेगळी आहात म्हणून मला नाही सांगता येत, इथे दोन्ही मीच आहे ना . इतर वेळेला अभिमान वाटावी अशी यांची हुशारी अशावेळी मात्र आपल्याला त्रासदायक ठरते.माझ्या  हुकुमाच्या एक्क्याचा तिने अगदीच जोकर करून टाकला.  तेवढ्यात तिच्या  मैत्रीणी तिला खेळायला बोलवायला आल्या. इतर वेळीस खासकरून परीक्षेच्या वेळीस मला व्हीलानसाराख्या वाटणाऱ्या या मैत्रिणी त्या दिवशी मात्र मला देवादुतासारख्या वाटल्या. सुटले, विसरेल आता असा विचार करून मी निर्धास्त झाले. दुसऱ्या दिवशी रविवार होता.दुपारी  जेवण झाल्यावर आमचे अहो हक्काची सुट्टी  एंजॉय करणे म्हणजे शक्य तेवढ झोपणे या नियमानुसार बेडरूम मध्ये गेले. चीनुही पाठोपाठ फोटो घेऊन. आता मात्र मला हसू आवरेना माझ्या अपेक्षेनुसार एक तर ती ओरडून घेणार होती किंवा बाबा ignore करतात म्हणून वैतागणार होती. पण हिला अहो काय सांगतायत याची मात्र मला प्रचंड उत्सुकता होती. चला बघुया काय होतंय म्हणून मीही मागोमाग आत गेले.  दोघांच्या गप्पा रंगात आल्या होत्या. मी शांतपणे whats ap वरचे messages चेक करत होते. अखेर तो क्षण आला..... मी लक्ष नसल्याचे दाखवत मोबाईल मध्येच डोकं खुपसून बसले.... " सांगा ना बाबा कोण जास्त आवडत तुम्हाला? मी कि हि फोटोतली चीनु? चिनूने विचारलं. क्षणभर विचार करून अहो तिच्याकडे बोट करून म्हणाले "जेव्हा हि चिनू घरात नसते तेव्हा या फोटोतली चिनू आवडते आणि जेव्हा हि चिनू घरात असते तेव्हा हीच आवडते." चिनू खुश झाली. माझ्याकडे कुत्सित नजरेने पाहून बाबांच्या कुशीत शिरली..  मी मात्र विचार करत राहिले  किती सहज समजावलं याने हिला. हे मला का नाही सुचल. असो. कधीतरी whats ap वर आलेला मेसेज आठवला, "
 एक लडकी चाहे कितनी भी कोशिश करे
फिरभी वो अपने पती के लिये रानी कभी नही बन सकती,
लेकीन हजार गलातीयोन्के बावजुद भी
अपने पापा के लिये राजकुमारी जरूर होती है. .....

©मानसी जोशी